کوئی خواب ماہی
تجلی کی کرنوں سے کچھ رونمائی
کہ نیندوں کے باغوں تلک ہو رسائی
مگر اس سے پہلے
جوانی کے پنگھٹ پہ جمنے نہ پائے
اداسی کی کالک، بڑھاپے کی کائی
رقابت کی گلیوں میں آنے نہ پائے
کوئی رو سیاہی
ذرا اس سے پہلے
کہ دیوارِ جاں میں دراڑیں نہ آئیں
کہیں خستہ تن ہو کے گِر ہی نہ جائے
جو مامور ہے روح پر جسم کا
اک شکستہ سپاہی
کسی نے کہاں جھانکا ویرانیوں میں
اداسی کی جانب توجہ دِلائی
کئی سال بِیتے، کئی قرن گزرے
وہ آواز آئی
کہ جس نے ہمیشہ کے جاگے ہوؤں کو
مئے نَو پلائی
پہاڑوں کے مالک
توجہ کے دریا سے بس ایک رائی
جدائی کی قسمت میں لکھ دے تباہی
اداسی کے آنگن میں برسوں
محبت نے چکّی چلائی
گھٹن عود آئی
کہ ہم نے بچھڑنے سے آغاز کر کے خدا سے
مقدر کی ترتیب اُلٹی کرائی
سفر کر رہی تھی لگائی بُجھائی
اِدھر بے اثر تھی ہماری دُہائی
ہمیں ایک دل میں جگہ چاہیۓ تھی
نہیں چاہیۓ تھی یہ ساری خدائی
حنا عنبرین
No comments:
Post a Comment