دل پہ چھالے ہیں لب پہ نالہ ہے

 دل پہ چھالے ہیں لب پہ نالہ ہے

اب یہ وحشت مِرا حوالہ ہے

جیسے پالے ہے ماں اپاہج کو

میں نے ایسے غموں کو پالا ہے

موجِ گِریہ سنبھال رکھے ہے

میں نے خود کو کہاں سنبھالا ہے

تیری فُرقت کے واسطے جاناں

ساری خوشیوں کو میں نے ٹالا ہے

جُھوٹ بولوں تو ہو ندامت کیوں

تیرے سانچے میں خود کو ڈھالا ہے

میں تو نفرت سے بچ رہا تھا مگر

اس محبت نے مار ڈالا ہے

ایک بے درد موج نے مجھ کو

ساحلوں کی طرف اچھالا ہے

ختم ہوتا نہیں جنونِ سفر

پاؤں پڑتا ہر ایک چھالا ہے

اب کے سید یہ دشت ہی میرا

ہم پیالہ ہے ہم نوالہ ہے

سید خرم نقوی