عارفانہ کلام حمدیہ کلام
خدائے شب کے لیے نذر بارگاہ میں رکھ
ستارۂ سحری روزنِ سیاہ میں رکھ
خود اپنے واسطے بس عطر داں قناعت کا
شکوہِ کج کُلہی لشکر و سپاہ میں رکھ
خلا میں بھیج اڑن طشتری تحیر کی
بڑھا کے تیز قدم دشتِ بے گیاہ میں رکھ
سعد خرام ہوں جب مہر و مہ سرِ افلاک
تو پیشوائی کو آنکھیں ستارہ گاہ میں رکھ
وَغا کی راکھ مَلے اسپ و فیل پیش قدم
نشان و طبل و علَم مرکزِ نگاہ میں رکھ
جلا کے سینۂ شب تاب، درد کی قندیل
متاعِ دل زدگاں دل کی خانقاہ میں رکھ
شکستگی کو ذرا حلقۂ کمند میں کھینچ
خراب و خستہ کو اک خیمۂ پناہ میں رکھ
جو مل سکے تو اک آسودگی کی ساعت کو
حسابِ کلفتِ دل، عشرتِ گناہ میں رکھ
بس ایک عرض یہی دستِ کردگاری سے
سفر کی آخری منزل کو شہرِ ماہ میں رکھ
عابد رضا
No comments:
Post a Comment