محبتوں کے چمن کی بہار لے کے چلیں
چلیں تو قافلۂ مُشکبار لے کے چلیں
پیام امن خلوص اور پیار لے کے چلیں
وفا کا جذبۂ بے اختیار لے کے چلیں
قدم سے پہلے کریں حوصلے کا اندازہ
بلند عزم، قوی اعتبار لے کے چلیں
غموں سے ماری ہوئی کم نصیب دنیا کو
نئے سے خواب نئے لالہ زار لے کے چلیں
جمال شوخ کا گر جاں فزا اشارہ ہو
تو چشمِ شوق و دل بے قرار لے کے چلیں
شناخت اپنی نہ کھوئیں جہاں بھی جائیں ہم
دل و دماغ میں اپنا دیار لے کے چلیں
بڑھائیں دولتِ اعمال نیک نغمی!، کہ
نہ حشر میں نگہِ شرمسار لے کے چلیں
ابرار نغمی
No comments:
Post a Comment