جو مرا خیال بھی ہو کہ تجھے میں بھول جاؤں
تو مِری بھی ہو کہ تجھے میں بھول جاؤں
کوئی دل بھلا سکا ہو اگر اپنی دھڑکنوں کو
تو کوئی مثال بھی ہو کہ تجھے میں بھول جاؤں
یہ زمیں یہ آسماں کیا مرے بھولنے کو کم ہیں
یہ کوئی سوال بھی ہو کہ تجھے میں بھول جاؤں
یہ زوالِ عقل بہتر کہ بھلا سکوں نہ تجھ کو
وہ اگر کمال بھی ہو کہ تجھے میں بھول جاؤں
جو کبھی یہ حال بھی ہو کہ میں آپ کو بھلا دوں
تو کبھی وہ حال بھی ہو کہ تجھے میں بھول جاؤں
میں جہانِ شور و شر میں کبھی رہ سکوں نہ زندہ
اگر احتمال بھی ہو کہ تجھے میں بھول جاؤں
تری یاد زخم ہے تو یہی زخم اور یہی دل
جو وہ اندمال بھی ہو کہ تجھے میں بھول جاؤں
تِری یاد ہجر ہے تو تِرے ہجر میں مروں گا
وہ اگر وصال بھی ہو کہ تجھے میں بھول جاؤں
جو یہ میری زندگی ہے کہ تجھے میں یاد رکھوں
تو وہ انتقال بھی ہو کہ تجھے میں بھول جاؤں
مری موت بن کر آئے وہ خیال، جانِ بِسمل
جو مجھے خیال بھی ہو کہ تجھے میں بھول جاؤں
بسمل سعیدی
No comments:
Post a Comment