کمال ضبط سخن اعتبار گریہ ہے

 کمالِ ضبطِ سخن، اعتبارِ گریہ ہے

نہیں ہوں کشتۂ مے یہ خمارِ گریہ ہے

طلسمِ کشفِ کراماتِ عشقِ آشفتہ

شکستِ شوق ہے اور برمزارِ گریہ ہے

ہے سوزِعشق، حریفِ تمازتِ آتش

خطائے چشمِ طلب، خواستگارِ گریہ ہے

چمن چمن ہے نشانِ بہارِ لالہ و گل

روش روش کرمِ نو بہارِ گریہ ہے

ہے خوں فشانیٔ چشمِ فلک کا خمیازہ

کہ اُوس شیشۂ تمثال دارِ گریہ ہے

قرارِ اشک نہیں، جُز بساطِ دامنِ دل

کہ چشمِ ترتوبس اک رہگزارِ گریہ ہے

فغاں ہے کربِ محبت کا غلغلہ انجم

عذابِ وحشتِ دل، اک شرارِ گریہ ہے

انجم عثمان