ان خرد مندوں نے میری جس قدر تضحیک کی
تیز تر اپنے جُنوں کی میں نے پھر تحریک کی
وا کروں گا میں زمانے پر درِ بابِ عدم
ایک دن تاریخ لکھ کر عرصۂ تاریک کی
مجھ سے ملنا ہے تو بل کھاتی وہ پگڈنڈی پکڑ
میرے گھر جاتی نہیں پکی سڑک نزدیک کی
آج پھر جانا پڑا تھا آئنے کے سامنے
آئنے نے آج پھر میری بڑی تضحیک کی
شہر کا ہر شخص دشمن لگ رہا ہے اب مجھے
میرے اندر پھیلی ہے ایسی وبا تشکیک کی
ہم کو دریوزہ گری بچپن سے سکھلائی گئی
چھوٹنی ممکن نہیں مشتاق عادت بھیک کی
حبیب الرحمٰن مشتاق
حبیب الرحمان مشتاق
No comments:
Post a Comment