کبھی پورا کبھی آدھا نظر آتا ہے مجھے

 کبھی پورا کبھی آدھا نظر آتا ہے مجھے

میرے اشعر تِرا سایہ نظر آتا ہے مجھے

یہ مِری آنکھ کا دھوکہ ہے کہ موسم ہے کوئی

اب اجالے میں اندھیرا نظر آتا ہے مجھے

یہ بصارت ہے مِری یا کہ بصیرت میری

ایک پردہ پسِ پردہ نظر آتا ہے مجھے

جس سے ٹپکے گا مِری آنکھ کا آنسو اک دن

آسماں کا وہی کونہ نظر آتا ہے مجھے

تیری ہر بات مجھے جان سے پیاری ہے بہت

تیری ہر بات میں دھوکہ نظر آتا ہے مجھے

اس کا مطلب ہے کہ حالات سنورنے لگے ہیں

اک پرندہ جو فضا میں نظر آتا ہے مجھے

میرا دکھ اب مِری برداشت سے باہر ہوا ہے

میری خواہش سے زیادہ نظر آتا ہے مجھے

تجھ کو معلوم ہے اس خواب کی تعبیر ہے کیا

چاند کے ساتھ ستارہ نظر آتا ہے مجھے

وہ جو تیار ہے ہر دم مِری ہمراہی کو

اپنی منزل سے وہ بھٹکا نظر آتا ہے مجھے

مجھ کو جنگل میں کہیں دور تلک جانا تھا

ہر طرف شہر کا نقشہ نظر آتا ہے مجھے

اب کہانی میں مِرا کوئی بھی کردار نہیں

تیرے اطوار سے خطرہ نظر آتا ہے مجھے

ایک صحرا ہے ابھی موج میں آنے والا

ایک دریا ہے کہ ٹھہرا نظر آتا ہے مجھے

تم محبت کو ابھی تک نہیں سمجھیں اتنا

ایک آسان طریقہ نظر آتا ہے مجھے

تُو نے گرداب کی صورت کو فقط دیکھا ہے

اس کے اندر سے کنارا نظر آتا ہے مجھے

سعید اشعر