نہ جانے کون سے بدلے اتارتی رہی ہے

نہ جانے کون سے بدلے اتارتی رہی ہے
یہ زندگی ہمیں قسطوں میں مارتی رہی ہے
اِدھر اُدھر کی عبث خاک چھانتے پھرے ہیں
جدھر جدھر ہمیں قسمت ہنکارتی رہی ہے
بھٹک رہی ہے خجل خواہشوں کے غاروں میں
وہ جستجو جو ستارے شکارتی رہی ہے
کسے حقیقتِ نیرنگئ جہاں کی خبر
ازل سے وقت کی فطرت بجھارتی رہی ہے
ہمارے سر سے بلائیں کہاں ٹلی ہوتیں
یہ اپنی ماں کہ جو صدقے اتارتی رہی ہے
اک اور بادِ بیاباں، اک اور یادِ غزال
وہ پھونکتی رہی ہے، یہ بہارتی رہی ہے
جہاں میں تھے ہی نہیں جب تو کیا پتہ پاتی
قضا، کہ نام ہمارا پکارتی رہی ہے
اک اپنی رَو کے جلو میں رہے ہیں اس سے ورے
بگاڑتی رہی ہے، یا سنوارتی رہی ہے
کہاں کسی سے کبھی رازِ دل کہا عالیؔ
یہ شاعری کہ ہمیں اشتہارتی رہی ہے

جلیل عالی