آوارگی برنگ تماشہ بری نہیں

آوارگی برنگِ تماشا بری نہیں

ذوقِ نظر ملے تو یہ دنیا بری نہیں

کہتے ہیں تیری زلفِ پریشاں کو زندگی

اے دوست! زندگی کی تمنا بری نہیں

ہے ناخدا کا میری تباہی سے واسطہ

میں جانتا ہوں نیتِ دریا بری نہیں

ذوقِ جنوں کے ساتھ ہے بیدارئ خِرد

شبنم کے ساتھ گرمئ شعلہ بری نہیں

اس رہزنِ حیات زمانے سے دور چل

مر بھی گئے تو چادرِ صحرا بری نہیں

ساغرؔ کے ساتھ چل کے کبھی میکدے میں سن

اتنی حدیثِ بادہ و صہبا بری نہیں

ساغر صدیقی