اس قدر پھیل گیا ہے شب ہجراں کا سکوت

اس قدر پھیل گیا ہے شبِ ہجراں کا سکوت

بولتا ہے کئی لہجوں میں غمِ جاں کا سکوت

رہ نمائی مِری کرتی ہے تِری سرگوشی 

میرے اسبابِ سفر میں ہے بیاباں کا سکوت

یہ بھی پیرایۂ اظہارِ شکایت ہی تو ہے 

کوئی سمجھےتو سہی دیدۂ ویراں کاسکوت

کوئی خواہش، کوئی حسرت، کوئی اظہارِخیال

کہیں برباد نہ کر دے دلِ ویراں کا سکوت

اک ذرا، پاؤں کی زنجیر جو ہِل جاتی ہے 

اپنا لہجہ ہی بدل لیتا ہے زنداں کا سکوت 

قیدِ تنہائی میں، جب تیرا خیال آتا ہے 

چیخ اٹھتا ہے اچانک، درِ امکاں کا سکوت 

شہر کا شہر، حزیں حال، پریشاں، گم صم

قابلِ دید ہے، اک بے سر و ساماں کا سکوت

تا دمِ حشر رواں، سلسلۂ کرب و بلا 

ہر کجا گریہ کناں، شامِ غریباں کا سکوت 

جب سے آفاقؔ بدلنے لگا پیراہنِ جاں

شور میں ڈوب گیا عالمِ حیراں کا سکوت

زاہد آفاق