اس چہرۂ حسیں کا خیال حسیں رہے

اس چہرۂ حسیں کا خیالِ حسیں رہے

دل میں کھلی سدا یہ کتابِ مبیں رہے

گلشن پسند ہم تھے پہ صحرا نشیں رہے

اندوہگیں سے ہاۓ ہم اندوہگیں رہے

سرمستی و سرور کا اس کے ٹھکانہ کیا

جس دل کی سمت وہ نگہِ سرمگیں رہے

خاکی تھے ہم تو خاک سے نسبت نہیں گئی

روۓ زمیں سے اٹھے تو زیرِ زمیں رہے

اس طرح بھی ملی ہے کبھی منزلِ مراد؟

دیکھی کہیں جو دھوپ تو سایہ نشیں رہے

منزل کی سمت چلتے زمانہ گزر گیا

دیکھا پلٹ کے جب تو جہاں تھے وہیں رہے

ہر لحظہ مٹتے جاتے ہیں رنگیں نقوشِ دہر

دنیا ہماری آنکھ میں کیوں کر حسیں رہے

ہر آرزوۓ دل سے تقاضا ہے روز و شب

جاۓ نکل یہ دل سے مِرے پھر کہیں رہے

اللہ رے، انقلابِ زمانہ کہ اے نظرؔ

کافر یہ کہہ رہا ہے، مسلماں نہیں رہے

نظر لکھنوی​

(محمد عبدالحمید صدیقی)