امداد غیب کا ہمیں کوئی گماں نہیں

امدادِ غیب کا ہمیں کوئی گماں نہیں

ہم وہ ہیں جن کے سر پہ کہیں آسماں نہیں

اتنا تو اس کے سامنے مشکل نہ تھا کلام

چھالا ہے اب تو جیسے دہن میں زباں نہیں

تیرِ نظر کی چاہ نے ایسا سجھا دیا

ابرو ہے تیرا سامنے، کوئی کماں نہیں

کم نرخ کر لیے ہیں شہِ شہر نے تو کیا

کم کر لیے ہیں باٹ ہمیں کچھ زیاں نہیں

بولوں میں کھوٹ ہو تو ملیں رازداں بہت

بولیں کھرا کھرا تو کوئی ہمزباں نہیں

جب سے ہوس ہوئی اسے ملبوس شاہ کی

اُس روز سے ہمارا کوئی پاسباں نہیں

ضو بھی ہے اس میں اور تحرک بھی ہے عجب

ماجؔد کا ہے کلام یہ ماہِ رواں نہیں

ماجد صدیقی