حقیقت محرم اسرار سے پوچھ

حقیقت محرمِ اسرار سے پوچھ

مزا انگور کا مے خوار سے پوچھ

وفا اغیار کی اغیار سے سن

مِری الفت در و دیوار سے پوچھ

ہماری آہِ بے تاثیر کا حال

کچھ اپنے دل سے کچھ اغیار سے پوچھ

دلوں میں ڈالنا ذوقِ اسیری

کمندِ گیسوئے خمدار سے پوچھ

دلِ مہجور سے پوچھ لذتِ وصل

نشاطِ عافیت بیمار سے پوچھ

نہیں جز گریۂ غم حاصلِ عشق

ہماری چشمِ دریا بار سے پوچھ

نہیں آبِ بقا جز جلوۂ دوست

کسی لب تشنۂ دیدار سے پوچھ

فریب وعدۂ دل دار کی قدر

شہیدِ خنجرِ انکار سے پوچھ

فغانِ شوق کو مانع نہیں وصل

یہ نکتہ عندلیبِ زار سے پوچھ

تصور میں کیا کرتے ہیں جو ہم

وہ تصورِ خیالِ یار سے پوچھ

متاعِ بے بہا ہے شعر حالؔی

مِری قیمت میری گفتار سے پوچھ

الطاف حسین حالی