پہلے فسانہ کیا تھا ترا اب فسانہ کیا

پہلے فسانہ کیا تھا تِرا اب فسانہ کیا

تجھ پر کوئی یقین کرے گا زمانہ کیا

ہم ایک دوسرے سے بندھے تو نہیں ہوئے

جانے کا کوئی ڈھونڈ رہے ہو بہانہ کیا

رہتا ہے میرے سامنے ہر پل تِرا خیال

تیرا کسی سے ذکر کروں غائبانہ کیا

تیرے تو ہاتھ کانپ رہے ہیں مثالِ برگ

تجھ سے ہمارے دل پہ لگے گا نشانہ کیا

شب کا قیام کیا ہے، کرو عمر بھر قیام

یہ سوچ لو کہ ہم کو کہے گا زمانہ کیا

ہونٹوں پہ تِرے وردِ خدا اس قدر ہے کیوں

ایسا گناہ تُو نے کِیا کافرانہ کیا

کچھ کام کر لیا ہے تو سر کو اٹھا کے چل

اتنا بھی اب مزاج بھلا عاجزانہ کیا

یہ وار تُو نے دل پہ کِیا، قاتلانہ کیا

تجھ کو خبر ہے تجھ کو کہے گا زمانہ کیا

اتنے بڑے قدم جو اٹھاتا ہے تُو عدؔیم

ایسے میں تیرے ساتھ چلے گا زمانہ کیا

عدیم ہاشمی