چھیڑ اب نہ اے تصور مژگان یار بس

چھیڑ اب نہ اے تصورِ مژگانِ یار بس

کافی ہے خار خار غمِ روزگار بس

یہ غم نہیں ہے وہ جسے کوئی بٹا سکے

غمخواری اپنی رہنے دے اے غمگسار بس

ہر داغ فصلِ گل کی نشانی ہے اے صبا

گل گشت کو بہت ہے دلِ داغدار بس

ڈر ہے دلوں کے ساتھ امیدیں بھی پس نہ جائیں

اے آسیائے گردشِ لیل و نہار بس

دیں غیر دشمنی کا ہماری خیال چھوڑ

یاں دشمنی کے واسطے کافی ہیں یار بس

آتا نہیں نظر کہ ہو یہ رات اب سحر

کی نیند کیوں حرام بس اے انتظار بس

تھوڑی ہے رات اور کہانی بہت بڑی

حاؔلی نکل سکیں گے نہ دل کے بخار بس

الطاف حسین حالی