مقدر ڈوبنا ٹھہرا تو پھر ایسا کیا جائے

 مقدر ڈُوبنا ٹھہرا تو پھر ایسا کِیا جائے

کہ اپنے آپ کو غرقِ مے و مِینا کیا جائے

کسی کی سُرخیٔ رُخسار کی خاطر ضروری ہے

کوئی خُونِ تمنا پھر لبِ دریا کیا جائے

کِدھر دیکھیں کہ کل عالم بنا ہے آئینہ خانہ

ہر اک ذرہ میں کیا اپنا ہی نظارا کیا جائے

وگرنہ کس نظر سے جرأت دیدار ممکن ہے

تماشہ اپنا ہے منظور تو پردا کیا جائے

نصیر انسانِ کامل ہے صفاتِ ذات کا حامل

جنابِ شیخ فتویٰ دیں تو پھر سجدا کیا جائے

نصیر نیازی