پھر کوئی بانگِ درا خوابِ گِراں تک پہنچے
کوئی آواز درُوں، خانۂ جاں تک پہنچے
شرق تا غرب ہر اک پِیر و جواں تک پہنچے
"میرا پیغام محبت ہے جہاں تک پہنچے"
اس تبسّم کی جھلک قلبِ تپاں تک پہنچے
کِھل اُٹھے غُنچۂ دل مُشک جہاں تک پہنچے
میری مہجورئ پیہم کا بھی درماں یا رب
قافلے شوق کے اسرارِ نہاں تک پہنچے
حوصلے نے گُل و گُلزار کیا صحرا کو
پاؤں ہمّت کے سرِ کوہستاں تک پہنچے
مر گئے گُھٹ کے دم اپنے ہی نہاں خانے میں
دل کے ارمان بہت کم ہی زباں تک پہنچے
پیار کہتے ہیں جسے نام ہے قُربانی کا
وہ تجارت ہے کہ جو سُود و زیاں تک پہنچے
اتنا آسان نہ تھا عشق کی منزل کا سفر
زندگی ہم نے لُٹائی تو یہاں تک پہنچے
تُو نے جو آگ لگائی تھی مِرے آنگن میں
اس کے شُعلے ہیں جو یہ تیرے مکاں تک پہنچے
میرا کردار بھی ہے گردشِ ایّام کے ساتھ
بے سبب نغمے نہیں آہ و فُغاں تک پہنچے
زندگی پُھونک چُکی آتشِ فُرقت دلدار
آگے یہ دُشمنِ جاں جانے کہاں تک پہنچے
دلدار احمد علوی
No comments:
Post a Comment