جیسے دیوار ہو اک دوسری دیوار کے ساتھ
ایسا ہی ایک تعلق ہے مِرا یار کے ساتھ
اس لیے آنکھ اٹھا کر بھی نہیں دیکھا کبھی
تُو نہ چل پائے گی دنیا مِرے معیار کے ساتھ
کیا عقیدت تھی تِرے شہر میں داخل ہوتے
رکھ دی دروازے پہ دستار بھی تلوار کے ساتھ
اس نے دیکھا تھا مجھے اتنی عقیدت سے کہ میں
چل پڑا اٹھ کے محبت سے خریدار کے ساتھ
میں نے اس واسطے پھر اور محبت نہیں کی
کیا کسے چاه سکوں گا دلِ بیمار کے ساتھ
اٹھ گئے سارے تماشائی تماشا اجڑا
مر گئی ساری کہانی مِرے کردار کے ساتھ
میثم علی آغا
No comments:
Post a Comment