جو صدف زیر آب ہوتی ہے

 جو صدف زیرِ آب ہوتی ہے

اصل میں لعلِ ناب ہوتی ہے

دیکھ تو روز تیری گلیوں میں

اپنی مٹی خراب ہوتی ہے

کوئی قاری نہ ہو تو کیا کیجے

ذات تو الکتاب ہوتی ہے

وہ ہی دیدار کا تقاضہ کرے

جس کو جلوے کی تاب ہوتی ہے

پیجیے گر نگاہِ ساقی سے

مے کشی تو ثواب ہوتی ہے

کون جانے کہ ہم فقیروں کی

ہر ادا لا جواب ہوتی ہے

جس کو آبِ حیات کہتے ہیں

اصل میں وہ شراب ہوتی ہے

وارثی کیا خبر نابینوں کو

چشمِ بِینا عذاب ہوتی ہے

بشارت وارثی