دیکھیے گردش افلاک سے کیا بنتا ہے

دیکھیۓ گردشِ افلاک سے کیا بنتا ہے

نم نہیں خاک تو پھر خاک سے کیا بنتا ہے

ایک بھولی ہوئی صورت کے حسیں خد و خال

کوزہ گر اور بتا چاک سے کیا بنتا ہے

سال ہا سال کے غم مثلِ گُہر بنتے ہیں

کیا کہا؛ دیدۂ نم ناک سے کیا بنتا ہے

جذبۂ عشق کے اظہار سے خائف مِری جاں

اب تِرے جذبۂ بے باک سے کیا بنتا ہے

قیس کا جا کے کریں چاک گریبان رفو

اور مِرے دامن صد چاک سے کیا بنتا ہے

پہلے تو ہم سے اسیروں کا قفس بنتا تھا

اب تِری زلف کے پیچاک سے کیا بنتا ہے

دل کی ندیا پہ بنانا ہے مجھے چاند کا عکس

دیکھ تجھ صاحب ادراک سے کیا بنتا ہے

شجاعت سحر جمالی