نشان سجدہ سبھی شہر کی جبین پہ تھا

 نشانِ سجدہ سبھی شہر کی جبین پہ تھا

بس ایک داغ تھا جو میری آستین پہ تھا

یہ دشت وشت اچانک سے بن گئے ہیں یہاں

وگرنہ میں تو بہت معتدل زمین پہ تھا

ہوا پہ تیری توجہ پہ یا کہ روشنی پر

بقائے ارض کا دار و مدار تین پہ تھا

اسی لیے تو سبھی تیر خالی جا رہے تھے

جسے نظر نہیں آتا وہ دوربین پہ تھا

عذاب لازمی ٹھہرا تھا شہر پر کیونکہ

یہاں کے لوگوں کا تکیہ منافقین پہ تھا

میں ظاہراً تو خدا سے علیحدہ رہتا تھا

یقین سارا اسی آسماں نشین پہ تھا

اسی لیے میں فلک زادوں کو پسند نہیں

کہ میرا پہلا قدم دوسری زمین پہ تھا

ذکی عاطف