اک ذرا سی چاہ میں جس روز بک جاتا ہوں میں

 اک ذرا سی چاہ میں جس روز بک جاتا ہوں میں

آئینہ کے سامنے اس دن نہیں آتا ہوں میں

رنج غم اس سے چھپاتا ہوں میں اپنے لاکھ پر

پڑھ ہی لیتا ہے وہ چہرہ پھر بھی جھٹلاتا ہوں میں

قرض کیا لایا میں خوشیاں زندگی سے ایک دن

روز کرتی ہے تقاضہ اور جھنجھلاتا ہوں میں

حوصلہ تو دیکھیے میرا غزل کی کھوج میں

اپنے ہی سینے میں خنجر سا اتر جاتا ہوں میں

دے سزائے موت یا پھر بخش دے تو زندگی

کشمکش سے یار تیری سخت گھبراتا ہوں میں

خواب سچ کرنے چلا تھا گاؤں سے میں شہر کو

نیند بھی کھو کر یہاں آلوک پچھتاتا ہوں میں

آلوک یادو