دھند کے پار کنارہ تو نہیں ہو سکتا

 دُھند کے پار کنارا تو نہیں ہو سکتا

یار طوفاں کا سہارا تو نہیں ہو سکتا

شب کو ہے چاہ چمکتے ہوئے روشن دن کی

ان چراغوں سے گزارا تو نہیں ہو سکتا

ہم ذرا تلخ دہن، تلخ سخن، تلخ روا

خلقتِ شہر سے یارا تو نہیں ہو سکتا

چاند مایوس سا لوٹا ہے ابھی سُوئے فلک

میرے محبوب سا پیارا تو نہیں ہو سکتا

ایک ہلکی سی کسک دل میں تو اٹھتی ہو گی

بے وفا سارے کا سارا تو نہیں ہو سکتا

دل کو زنجیر بکف کر دیا تیری خاطر

پھر وہ تقدیر سے ہارا تو نہیں ہو سکتا

آشیاں خود ہی تو برباد کیا چڑیوں کا

کسی تنکے کا سہارا تو نہیں ہو سکتا

کیوں مِرے دل کے مکیں پر یوں جرح جاری ہے

وہ بھی عرشوں سے اتارا تو نہیں ہو سکتا

ہما علی