آنکھوں میں اشک لب پہ ہنسی چاہتا ہوں میں

 آنکھوں میں اشک لب پہ ہنسی چاہتا ہوں میں

جو آپ چاہتے ہیں وہی چاہتا ہوں میں

یعنی یہی کہ قفلِ در مے کدہ کھلے

کل چاہتے ہیں آپ ابھی چاہتا ہوں میں

مجرم ہوں میں کہ آج وفا جرم ہی تو ہے

اس جرم کی سزا بھی کڑی چاہتا ہوں میں

اس سے ملوں خود اس کا پتہ پوچھتا ہوا

اے عشق اتنی بے خبری چاہتا ہوں میں

میں خود ہوں اک دلیل، عدم کے وجود پر

پردہ ہوں، اور پردہ دری چاہتا ہوں میں

کیا کیا نقوش میں نے بنا کر مٹائے ہیں

داد کمالِ بے ہنری چاہتا ہوں میں

ہے بات جب کہ پھر کوئی نہ تشنہ لب ملے

اے جبر! اتنی تشنہ لبی چاہتا ہوں میں

خالد! مجھے تو ترک تعلق بھی ہی قبول

دراصل یوں بھی اُن کی خوشی چاہتا ہوں میں

خالد علیگ