عالم ذات میں امکان سے بھاگے ہوئے لوگ

 عالمِ ذات میں امکان سے بھاگے ہوئے لوگ

جا گرے قبر میں شمشان سے بھاگے ہوئے لوگ

جو جہالت سے بچے،۔ علم کی خوراک  بنے

غرقِ دریا ہوئے طوفان سے بھاگے ہوئے لوگ

دوسرا عشق تھا پہلے کی تلافی، لیکن

سود میں گھر گئے نقصان سے بھاگے ہوئے لوگ

اپنی زلفوں میں سجا ان کو معطر کر دے

کاغذی پھول ہیں گلدان سے بھاگے ہوئے لوگ

زندگی چہرے نہ تک، پانی پلا، بیڑیاں کاٹ

ہم ہیں حالات کے زندان سے بھاگے ہوئے لوگ

عید کس دل سے مناتے ہیں ہمیں جانتے ہیں

ہم گنہگار ہیں رمضان سے بھاگے ہوئے لوگ

شعر کہتے ہیں ریاضت کی بنا پر اکثر

ہم سے عرفان سے، وجدان سے بھاگے ہوئے لوگ

اپنے حصے کا عبث ڈھونڈتے ہیں رزق رباب

تنگ دامان یہ مہمان سے بھاگے ہوئے لوگ

رباب حیدری