اجر کیا ہے عذاب کیا شے ہے

اجر کیا ہے عذاب کیا شے ہے

یہ گناہ و ثواب کیا شے ہے

تیرے ہجراں میں یہ کھُلا مجھ پر

رُوح کا اضطراب کیا شے ہے

ان بہاروں کے کیا معانی ہیں

تتلی، خُوشبو، گُلاب کیا شے ہے

تیرا چہرہ ہی جانتا ہوں میں

کیا خبر ماہتاب کیا شے ہے

دشت میں کون مجھ کو سمجھائے

پانی کیا ہے سراب کیا شے ہے

زندگی بے تکلفی ہے میاں

خود بتاؤ حجاب کیا شے ہے

برق شعلہ نہ روشنی ہے کوئی

پھر تِری آب و تاب کیا شے ہے

تیری آنکھوں سے جو نشہ پایا

جام کیا ہے، شراب کیا شے ہے

کیا معمّہ ہے لفظ عُریانی

پردہ کیا ہے نقاب کیا شے ہے

ایک واقف! سمجھ نہیں آتا

جانے عالی جناب کیا شے ہے

سلیم واقف