جب روز وہ غیروں کی ملاقات کو پہنچے
کیوں ٹھیس نہ پیہم مِرے جذبات کو پہنچے
دن رات غضب اور ستم ڈھائے جنہوں نے
وہ لوگ بہت جلد مکافات کو پہنچے
ہم جب بھی تلاشِ گل و گلزار کو نکلے
بس خارِ مغیلاں کے مقامات کو پہنچے
اس نے ہمیں پل بھر کا بھی دیدار نہ بخشا
ہم سر کے بل اس بت کی ملاقات کو پہنچے
سیلاب ہو آندھی ہو تلاطم ہو بھنور ہو
ہر حال میں ہم تیری مدارات کو پہنچے
غنچوں نے تِرے ناز کی نقلیں تو اتاریں
لیکن نہ کوئی تیرے کمالات کو پہنچے
وہ شعر کوئی شعر نہیں اور ہی شے ہے
جب کوئی بھی قاری نہ تِری بات کو پہنچے
وہ لفظ میں رکھتا نہیں اشعار میں ہر گز
جس لفظ سے کچھ ضعف محاکات کو پہنچے
ناصر! شعراء ہی ترے اشعار کو سمجھیں
ہر شخص کہاں روحِ خیالات کو پہنچے
فیض الحسن ناصر
No comments:
Post a Comment