عارفانہ کلام نعتیہ کلام
یوں ابر کہیں اور برستا نہیں دیکھا
کیا دیکھا اگر تو نے مدینہ نہیں دیکھا
میں بن کے قلم رقص میں رہتا ہوں ورق پر
کیا جشنِ ولادتﷺ کا مہینہ نہیں دیکھا
جو مسجدِ نبوی کی ادب گہ میں ہے جاری
دنیا نے کسی بردے کا سجدہ نہیں دیکھا
ہر طاق میں اشکوں کے دیے رکھتی تھیں آنکھیں
تُو نے شبِ رخصت مِرا رونا نہیں دیکھا
ضو خود ہو رقم لوحِ دل و جاں پہ سرِ شب
مدحت کے سوا ایسا وظیفہ نہیں دیکھا
کس موسمِ شاداب کی رہتی ہے تمنا
کیا چشمِ فلک، گنبدِ خضرا نہیں دیکھا
تم مفلس و نادار نہ کہتے مجھے صاحب
شاید ابھی منگتے کا یہ کاسہ نہیں دیکھا
ممنون ہے انگشتِ پیمبرﷺ کا ابھی تک
لوگوں نے کبھی چاند کا چہرہ نہیں دیکھا
تصویرِ ادب بن کے مواجھے میں کھڑی ہے
خوشبو کا کبھی تُو نے سراپا نہیں دیکھا
امشب بھی ریاض آپ نے اربابِ ثنا کا
کیا اوجِ ثریا پہ نصیبہ نہیں دیکھا
ریاض حسین چودھری
No comments:
Post a Comment