افکارِ جنوں پر شعر کہو
معیارِ جنوں پر شعر کہو
ایامِ سبک رفتار میں تم
ادوارِ جنوں پر شعر کہو
جب قیس تبسم فرمائیں
آزارِ جنوں پر شعر کہو
دشمن سے نہتا لڑتا ہے
سالارِ جنوں پر شعر کہو
میں حُسن پہ غزلیں کہتی ہوں
تم پیارے، جنوں پر شعر کہو
اک نظم لکھو بنجاروں پر
بازارِ جنوں پر شعر کہو
کیوں راز چھپائے رکھنا ہے
ایثارِ جنوں پر شعر کہو
از صبحِ ازل تا شامِ ابد
بس کارِ جنوں پر شعر کہو
رکھنا ہو جو پاسِ عہدِ وفا
اقرارِ جنوں پر شعر کہو
اک چاہِ زنخداں کے صدقے
بیمارِ جنوں پر شعر کہو
بشریٰ مسعود
No comments:
Post a Comment