عارفانہ کلام حمد نعت منقبت
چاند سورج تِرے، ہر ایک ستارہ تیرا
ظلمتِ دہر میں ہر سُو ہے اُجالا تیرا
گو تِرے عہدِ مبارک سے رہا ہوں محروم
تیری سیرت میں نظر آتا ہے چہرہ تیرا
تیری اُمت، تِری نسبت کے شرف سے زندہ
تیری نکہت سے مہکتا رہا صحرا تیرا
معجزہ تیری نبوّت کا ہے کتنا روشن
یعنی ہے مصحفِ قرآں، یدِ بیضا تیرا
چاہیۓ خیر کے ایوان کی تعمیر اگر
کام اس کام میں دیتا ہے سراپا تیرا
شبِ دنیا میں ضیا تیری ہے، اے ماہِ عربؐ
فرش سے عرش تلک طاری ہے ہالہ تیرا
شعر لکھتا ہوں تِری نعت کا، جب بھی آقاؐ
جھلملاتا ہے مِرے ذہن میں روضہ تیرا
لالۂ صحرائی
چوہدری محمد صادق
No comments:
Post a Comment