یثرب کی نینوا کے ستم پر نظر نہیں

 عارفانہ کلام حمد نعت منقبت

یثرب کی نینوا کے ستم پر نظر نہیں

گھر کس کا لُٹ رہا ہے کسی کو خبر نہیں

آئی اگر تو ایسی قیامت نہ آئے گی

عشرے کی صُبح صُبحِ قیامت اگر نہیں

پیشِ نظر حسینؑ کے ہیں دو جہاں مگر

اللہ پر نظر ہے،۔ کسی پر نظر نہیں

انصار ہیں حسینؑ کے دونوں سے بے نیاز

جینے کی آرزو نہیں، مرنے کا ڈر نہیں

سوتے ہیں جلوہ گاہِ مؤدّت میں سرفروش

دل اُن کے پہلوؤں میں ہیں، شانوں پہ سر نہیں

یوں آگ دے رہے ہیں مسلماں خیام میں

جیسے یہ گھر نبیؐ کے نواسے کا گھر نہیں

ماتم کل اس کا سارے زمانے میں دیکھنا

لاشے پہ جس کے آج کوئی نوحہ گر نہیں

اشکِ عزا کی تہ میں ہے طُوفاں چُھپا ہوا

دُنیا میں نجم! چشمِ حقیقت مگر نہیں 

نجم آفندی