نگاہِ یار جسے آشنائے راز کرے
وہ اپنی خوبئ قسمت پہ کیوں نہ ناز کرے
دلوں کو فکرِ دو عالم سے کر دیا آزاد
تِرے جنوں کا خدا سلسلہ دراز کرے
خِرد کا نام جنوں پڑ گیا، جنوں کا خِرد
تِرے ستم سے میں خوش ہوں کہ غالباً یوں بھی
مجھے وہ شاملِ اربابِ امتیاز کرے
غمِ جہاں سے جسے ہو فراغ کی خواہش
وہ ان کے دردِ محبت سے سازباز کرے
امیدوار ہیں ہر سمت عاشقوں کے گروہ
تِری نگاہ کو اللہ دلنواز کرے
تِرے کرم کا سزاوار تو نہیں حسرتؔ
اب آگے تیری خوشی ہے جو سرفراز کرے
حسرت موہانی
No comments:
Post a Comment