میری فصل گل نہ ہوئی تو کیا میرا باغباں نہ ہوا تو کیا

میری فصلِ گل نہ ہوئی تو کیا، میرا باغباں نہ ہوا تو کیا

مجھے اعتبار قفس تو ہے، اگر آشیاں نہ ہوا تو کیا

میرے واقعاتِ وفا ہیں وہ، کہ جہان عشق سمجھ گیا

میرا نام مصلحتاً اگر سرِ داستاں نہ ہوا تو کیا

مجھے اب چمن سے غرض ہے کیا کہ اسیر کنجِ قفس ہوں میں

میرا آشیاں جو ہوا تو کیا، میرا آشیاں نہ ہوا تو کیا

یہ جگر پہ ہاتھ، یہ آنکھ نم، کہو بات کون سی چھپ گئی

جو میری زباں سے فسانۂ شبِ غم بیاں نہ ہوا تو کیا

سر چرخ چاند بھی چھپ گیا، سر شام شمع بھی بجھ گئی

شبِ ہجر کٹ گئی اے قمرؔ کوئی مہربان نہ ہوا تو کیا

استاد قمر جلالوی