سبھی گناہ دھل گئے سزا ہی اور ہو گئی

سبھی گناہ دھل گئے سزا ہی اور ہو گئی

مِرے وجود پر تیری گواہی اور ہو گئی

رفو گرانِ شہر بھی کمال لوگ تھے مگر

ستارہ ساز ہاتھ میں قبا ہی اور ہو گئی

بہت سنبھل کے چلنے والی تھی پر اب کے بار تو

وہ گل کھِلے کہ شوخئ صبا ہی اور ہو گئی

یہ میرے ہاتھ کی لکیریں کھُل رہی تھیں یا کہ خود

شگن کی رات خوشبوئے حنا ہی اور ہو گئی

اندھرے میں تھے جب تلک زمانہ سازگار تھا

چراغ کیا جلا دیا، ہوا ہی اور ہو گئی

نجانے دشمنوں کی کون سی بات یاد آ گئی

لبوں تک آتے آتے بد دُعا ہی اور ہو گئی

پروین شاکر