دکان حبس میں وہ جالیاں بناتا تھا

 دکانِ حبس میں وہ جالیاں بناتا تھا

گھٹن سے مر گیا جو کھڑکیاں بناتا تھا

تباہی یہ اسی پیپل کی بد دعا سے ہے

کہ جس کے سائے میں تُو آریاں بناتا تھا

تمام خواہشیں تالے لگا کے رکھتا تھا

وہ بے مکاں تھا مگر چابیاں بناتا تھا

کھِلا کے زہر جسے ذائقے کا پوچھا گیا

کبھی مٹھاس بھری ٹافیاں بناتا تھا

جو صبح تین بجے مر گیا خموشی سے

پتا چلا کہ وہی سیٹیاں بناتا تھا

احمد آشنا