ہوتا ہے شب ہجر میں اس بات کا امکان

 ہوتا ہے شبِ ہجر میں اس بات کا امکان

خوابوں کے جزیرے پہ ملاقات کا امکان

ہم ایسے فقیروں نے سرِ ذہن رکھا ہے

اک آنکھ سے بٹتی ہوئی خیرات کا امکان

ان ہونٹوں سے کی جاتی ہے دونوں کی توقع

تردید کا دھڑکا،۔ کبھی اثبات کا امکان

اک شخص سے ملنے کی تمنا مِرے دل میں

ہے قحط زدہ گاؤں میں برسات کا امکان

عادت ہے ہر اک بات پہ آمین کی مجھ کو

بننے نہیں دوں گا میں شکایات کا امکان

بھرپور جوابات لیے پھرتا ہوں اب کے

ہے پیش نظر میرے سوالات کا امکان

کوشش کے نتیجے میں نکل سکتا ہے حماد

سورج کے تعاقب میں کسی رات کا امکان

خلیل الرحمٰن حماد