تازہ ہے زخم دکھ ہے پرانے کا آج بھی

 تازہ ہے زخم دکھ ہے پرانے کا آج بھی

غم ہے مکینِ دل کے بھلانے کا آج بھی

لمحہ قفس میں یاد کی لپٹا ہوا ہے دیکھ

اس کی جبِیں پہ ہونٹ سجانے کا آج بھی

بالوں میں آ گئی ہے سفیدی اور ایک میں

خواہاں ہوں اس کو اپنا بنانے کا آج بھی

دل سے گئے ہوئے اسے صدیاں گزر گئیں

زندہ ہے سوگ خود کو رُلانے کا آج بھی

سیٹی بجی جو ریل کی پھیلی فسردگی

منظر ہے منتظر کیوں ہنسانے کا آج بھی

واقف ہوں کیفیات سے اس کی مگر مجھے

آتا نہیں ہے ڈھنگ منانے کا آج بھی

آہ و بکا ہو، سسکیاں ہوں، یاد ہو بھلے

ملتا ہے مول اشک بہانے کا آج بھی

سچا ہو عشق رُوح کی تسکین ہیں الم

سودا بُرا نہیں ہے نبھانے کا آج بھی

سر پر ہے غم کی پوٹلی پگڈنڈیاں ہیں چُپ

صدمہ ہے دل کو لوٹ کر جانے کا آج بھی

کہتی ہے سرخوشی مجھے کاشف تمام رات

بانہوں میں اپنی بھر کے سُلانے کا آج بھی

کاشف رانا