فضول زادِ سفر کو بڑھا لیا میں نے
طلب تھی بوند کی دریا اٹھا لیا میں نے
ہدف تو روح تھی اس تیر کا مِری لیکن
بدن پہ اپنی مہارت سے کھا لیا میں نے
مِری طلب کا مکمل نہ بن سکا چاہے
کسی کو حسبِ ضرورت بنا لیا میں نے
شکستہ جسم بھی چلنے لگا ہے اچھا بھلا
بس ایک ضبط کا پرزہ نیا لیا میں نے
قریب تھا مِرا سارا بدن جلا دیتا
پھر ایک آگ سے پانی بجھا لیا میں نے
طویل بحث سے قائل نہ دل ہوا گاہے
تو گاہے عقل کو پَل میں منا لیا میں نے
عزم الحسنین عزمی
No comments:
Post a Comment