سنبھالے ابر کرم تو سنبھل بھی سکتی ہے

 سنبھالے ابرِ کرم تو سنبھل بھی سکتی ہے

یہ دل کی شاخ ابھی پھول پھل بھی سکتی ہے

بجھاؤ مغربی آتش کی بڑھ کے چنگاری

کہ اس سے مشرقی تہذیب جل بھی سکتی ہے

عروج ظرف کی حد سے نکل نہ جائے کہیں

یہ شے فراز پہ جا کر پھسل بھی سکتی ہے

ہم آج زور محبت کا آزمائیں گے

سنا ہے رخ یہ ہوا کا بدل بھی سکتی ہے

یہ سرد سرد ہوائیں یہ چاندنی یہ فراق

تِرے لیے یہ طبیعت مچل بھی سکتی ہے

کسی پہ مرنے سے پہلے مجھے نہ تھا معلوم

کہ ایسے جینے کی حسرت نکل بھی سکتی ہے

قدم قدم پہ اجالوں کا اہتمام کرو

کہ چلتے چلتے کہیں شام ڈھل بھی سکتی ہے

کمالِ ضبط کو میرے مِرا خدا رکھے

یہ مفلسی مِرے ٹکڑوں پہ پل بھی سکتی ہے

خلوص، مہر و وفا، پیار اور محبت سے

بدل کے دیکھیۓ، دنیا بدل بھی سکتی ہے

ہری بھری سی رُتوں میں یہ ڈھل بھی سکتی ہے

خزاں کی زرد سی رنگت بدل بھی سکتی ہے

ادب کی شان بنوں آرزو یہ ہے زریاب

مگر یہ کیا مِری حسرت نکل بھی سکتی ہے

ہاجرہ نور زریاب