وہ چال چل کہ زمانہ بھی ساتھ چلنے لگے

وہ چال چل کہ زمانہ بھی ساتھ چلنے لگے

نگار زیست تِری سمت رخ بدلنے لگے

وفورِ یاس میں مژدہ ہے کس کے آنے کا

یہ آج کیوں سرِ مژگاں چراغ جلنے لگے

زمانہ پھیر لے آنکھیں تو کیا گِلہ اس کا

ستم تو یہ ہے کہ تم بھی نظر بدلنے لگے

مجھے یہ ڈر ہے بہ ایں وصف احترام وفا

نہ تیری چشم محبت کہیں بدلنے لگے

یہ داغِ سجدہ تو ننگِ جبیں ہے اے زاہد

اگر نہ سوزِ محبت سے دل پگھلنے لگے

نہ پوچھ کس نگۂ خاص کا تصرف ہے

قدم جو راہِ محبت میں خود سنبھلنے لگے

حمید! شامِ غریباں کا کس لیے شکوہ

وہ دیکھ جانبِ منزل چراغ جلنے لگے

حمید ناگپوری