جدید ماورائی حد بندی یار جینے بھی دو

 جدید ماورائی حد بندی

خلقتِ دھر نے یہ جو پرکار سے کھینچ رکھے ہیں سب دائرے

احتجاجاً میں ان کو نہیں مانتا

یعنی اٹلی کی سڑکوں سے جتنے بھی سیاح

ہنزہ کے پربت کو چُھونے کی خاطر گھروں سے چلیں

ان کو یہ سرحدی بیریئر روک لیں

اور ڈھاکا میں نوشاد نوری کی بیٹی 

اگر پھر سے لاہور آنے کو ترسے تو قدغن لگے

غار کے آدمی کی یہ تہذیب کتنی اکائیوں میں تحلیل ہوتی گئی

گویا باڑہ ہے بھینسوں کا، چاروں طرف بانس سے بندھے

پھر تو ایسا ہے جتنی سمندر میں ہیں مچھلیاں، وہ بھی پابند ہوں

اور اڑتے ہوئے سب پرندوں کی سرحد بنے

رسیوں سے جکڑ لیجیۓ روشنی چاند کی

پھیلتی خوشبوؤں کے دھن بند ہوں

کرۂ ارض پہ یار جینے بھی دو

آسمانوں پہ بستے ہوئے چند رب کے فرشتوں نے ہامی بھری

تو بناؤں گا دھرتی کی صورت نئی

کھینچ دوں گا زمیں کے میں سر سے نئی مانگ کا بیریئر

عرفان شہود