کیوں جھگڑتی ہیں بے سبب ماں جی

 ماؤں کے عالمی دن پر

کیوں جھگڑتی ہیں بے سبب، ماں جی

میں بڑا ہو گیا ہوں اب، ماں جی!

بھلے وقتوں کی آپ کی ہے سوچ

اب بھلا وقت ہے ہی کب، ماں جی

وہ زمانہ نہیں رہا، مانیں

ہے یہی زندگی کا ڈھب، ماں جی

میں تو پھر آپ سے ہوا باغی

لوگ بُھولے ہوئے ہیں رب، ماں جی

اندھے قانون کچھ ہیں فطرت کے

یہ خدا کا نہیں غضب، ماں جی

آپ نے بھی تو زندگی کی ہے

جانتی ہوں گی آپ سب، ماں جی

میں سمجھ لوں گا آپ کی باتیں

آپ جتنا بنوں گا جب، ماں جی

آپ بس یہ دعائیں میرے لیے

چھوڑئیے گا نہ اب نہ تب، ماں جی

ہے تو بیٹا ناں آپ کا راحیل؟

لڑ کے ہوتے ہیں بے ادب، ماں جی

راحیل فاروق