خدایا حسن والوں پر عنایت یہ بھی کی ہوتی

خدایا حُسن والوں پر عنایت یہ بھی کی ہوتی

دہن شیریں تو بخشا تھا زباں شیریں بھی دی ہوتی

برابر کے تماشے میں غضب کی دل کشی ہوتی

بھڑکتے ہیں اِدھر شعلے، اُدھر بھی کچھ لگی ہوتی

سزا تو عقش نے پائی محبت کی عدالت میں

تقاضا یہ تھا پائے حُسن میں بیڑی پڑی ہوتی

کلیجے سے لگا رکھا ہے دنیا بھر کا غم ہم نے

یہی ہے زندگی یارب تو یہ ہم نے نہ کی ہوتی

بڑھا دی زندگی کی قدر و قیمت موت نے ورنہ

بغیر اس کے بہت بے لطف اپنی زندگی ہوتی

رتنؔ حُسنِ زباں کے ساتھ اگر حُسنِ بیاں ہوتا

جہاں میں قابلِ تقلید تیری شاعری ہوتی

پنڈت رتن پنڈوری