وہ منفرد تھی جدا تھی نرالی ہوتی تھی

 وہ منفرد تھی جدا تھی نرالی ہوتی تھی

اور اس کی شوخ طبیعت ابالی ہوتی تھی

مِرا تو بس پہ لٹک جانا اک غنیمت تھا

اور اس کے واسطے ہر سیٹ خالی ہوتی تھی

وہ کیسے چھپ کے مجھے دیکھتی تھی کمرے سے

برآمدے سے کچن تک تو جالی ہوتی تھی

وہ امتزاج پسند اتنی شوخ چنچل تھی

سفید کُرتے کی میچنگ بھی کالی ہوتی تھی

جی دودھ ختم ہے، بس آئی بابا، پانچ منٹ

یوں باتوں باتوں میں چائے بنا لی ہوتی تھی

وہ سِپ لگا کے بتاتی تھی چائے میٹھی نہیں

ستم تو دیکھ کہ چینی بھی ڈالی ہوتی تھی

علی اعجاز سحر

سحر ستانوی