محبت خدا کی حقیقت کا نور

محبت

محبت خُدا کی حقیقت کا نُور

محبت کسی کا پیامِ ظہور

محبت کے پیغامبر انبیاء

محبت کے زیر اثر اولیاء

محبت نقوشِ بیاضِ وجود

تر و تازہ اس سے ریاضِ شہود

محبت نہیں تو نہیں زندگی

محبت سے ہے دل نشیں زندگی

محبت سے ہر ذرہ پیوستہ ہے

طرب زا محبت کا گُلدستہ ہے

نشاطِ محبت، رفیقِ حیات

کیے اس نے حل زندگی کے نُکات

محبت سے ہر اک حقیقت عیاں

محبت سے ماں کی فضیلت عیاں

محبت سے شانِ پدر سر بلند

محبت سے وصفِ پسر ارجمند

محبت سے مضبوط اجزائے قوم

محبت سے مربوط آرائے قوم

محبت سے قائم نظامِ حیات

تغیّر میں بھی ان کا نُورِ ثبات

محبت نہیں ہے تو کچھ بھی نہیں

محبت ہی ہے اصل دنیا و دِیں

علی منظور حیدرآبادی