بہت خوش تھا ہر اک انساں چراغِ گمرہی لے کر

 عارفانہ کلام حمد نعت منقبت

بہت خوش تھا ہر اک انساں چراغِ گمرہی لے کر

تو ایسے میں رسولﷺ آئے جلو میں روشنی لے کر

خدا خود نعت کہتا ہے نبیﷺ کی دیکھیے قرآں

تو پھر ہم کیوں نہیں پہنچیں یہاں نعتِ نبیؐ لے کر

ابھی جنت نہیں قسمت میں لیکن یہ بھی کیا کم ہے

بہت سرشار رہتا ہوں مدینے کی گلی لے کر

بحکمِ ایزدی عرشِ بریں سے جبرائیلؑ اکثر

رسولِ پاکؐ کی خدمت میں آتے تھے وحی لے کر

محمدؐ کے قدم سے اس کا گھر روشن رہا برسوں

چراغِ آمنہؑﷺ دائی حلیمہ جب گئی لے کر

جہاں ہر شخص ہے اک دوسرے کے قتل کا خواہاں

چلو کوثر وہاں پیغامِ صلح و آشتی لے کر

معین الدین کوثر