لُطف و سجود ہو چکا کیف کہاں نماز میں
ہو گئی گُم نِگاہِ شوق جلوۂ کعبہ ساز میں
راہِ حرم سے بیخودی کھینچ ہی لائی سُوئے دیر
لے تو چلی تھی بے دِلی دام گہِ نیاز میں
پِھر وہی قلبِ عِشق میں ذوقِ کلیم جاگ اُٹھا
کوند رہی ہیں بِجلیاں چشمِ نظارہ باز میں
دِل پہ برس برس پڑا ابرِ شرابِ ارغواں
ہائے وہ سُرخ سے خطوط دِیدۂ نِیم باز میں
تابِ نظارہ ہو نہ ہو رُخ سے نقاب اُٹھا بھی دے
جلوہِ صد حیات ہے ایک نگاہِ ناز میں
مسلکِ شیخ و برہمن شیوۂ بندگی نہیں
دیکھ رواں دواں نہ ہو وادئ اِمتِیاز میں
جھوم رہی ہیں ٹہنیاں جھول رہی ہیں کونپلیں
اُف رے سُرورِ گُستری خلوتیانِ راز میں
جان کا کیا ہے جائے گی موت کا کیا ہے آئے گی
کیوں رہے شرحِ زِندگی حلقۂ دامِ راز میں
احسان دانش
No comments:
Post a Comment