ترا خیال کہ خوابوں میں جن سے ہے خوشبو

یادیں

تِرا خیال کہ خوابوں میں جن سے ہے خُوشبُو
وہ خواب جن میں میرا پیکرِ خیال ہے تُو
ستا رہی ہیں مجھے بچپنے کی کچھ یادیں
پچاس سال کی یادوں کے نقش اور نقشے
وہ کوئی نصف صدی قبل کا زمانۂ ہُو
وہ گرمیوں کے شب و روز، دوپہر کی وہ لُو

وہ گرم و خشک مہینے وہ جیٹھ، وہ بیساکھ
کہ حافظے میں کبھی آہ ہیں، کبھی آنسُو
وہ زائیں زائیں کے کتنے مہیب زناٹے
فضا کا ہول، ہوا کی وہ وحشتیں ہر سُو
وہ سائیں سائیں کے کتنے عجیب سناٹے
وہ سنسنی، وہ پر اسرار ایک عالمِ ہُو
وہ کھڑکیوں میں ہواؤں کی سرکشی، تندی
وہ بام و در پہ مسلط جہنمی جادُو
وہ پیچ و تاب بگولوں کا میرے آنگن میں
چڑیلیں گھر میں گُھس آئی ہیں کھول کر گیسُو
وہ لو کا زور کہ سارے کواڑ بجتے ہیں
کہ جیسے لشکرِ جنات کا عمل ہر سُو
وہ شور جیسے بگولوں میں بُھوت رقصاں ہوں
وہ فاہ فاہ وہ ہاہ ہاہ وہ ہونک وہ ہُو ہُو
گُزر رہا ہے تصوّر سے جیٹھ کا موسم
اور اس سمے میں مجھے یاد آ رہا ہے تُو

رئیس امروہوی