درد کے گیت سنا کر لے جائے

 درد کے گیت سنا کر لے جائے

جب وہ چاہے منا کر لے جائے

آئے تو انجمن آرائی ہو

جائے تو بزم اٹھا کر لے جائے

اپنی ہستی تو ہے تنکے کی طرح

جانے کب موج بہا کر لے جائے

دل میں کچھ درد سوا ہے یارو

 دل میں کچھ درد سوا ہے یارو

آج رونا بھی روا ہے یارو

سانس لیتا ہوں تو دم گُھٹتا ہے

کیسی بے درد ہوا ہے یارو

میں جو ہنستا ہوں تو رو دیتے ہیں

تم کو کیا آج ہوا ہے یارو

رہگزاروں میں روشنی کے لیے

 رہ گزاروں میں روشنی کے لیے

لے کے نکلے ہیں آندھیوں میں دِیے

ذائقہ تلخ ہے محبت کا

آدمی زہرِ غم پیۓ نہ پیۓ

دل میں یادوں کے رتجگے جیسے

ٹمٹماتے ہوں مرگھٹوں کے دِیے

تجھ سے پہلے جو تمنا تھی وہی ہے اب تک

تجھ سے پہلے جو تمنا تھی وہی ہے اب تک

تجھ کو پا کر بھی کسی شے کی کمی ہے اب تک

ہمیں جینا ہے ابھی نِت نئے الزام نہ دو

ہم نے کب بات تمہیں دل کی کہی ہے اب تک

تجھ سے مل کر بھی تِرے ہجر کے صدمے نہ گئے

اس مسرت میں بھی احساسِ غمی ہے اب تک

جب بہار آئی تو صحرا کی طرف چل نکلا

جب بہار آئی تو صحرا کی طرف چل نکلا

صحنِ گُل چھوڑ گیا، دل مِرا پاگل نکلا

جب اُسے ڈھونڈنے نکلے تو نشاں تک نہ ملا 

دل میں موجود رہا، آنکھ سے اوجھل نکلا

اِک ملاقات تھی جو دل کو سدا یاد رہی

ہم جسے عمر سمجھتے تھے، وہ اِک پل نکلا